Ширкат дар изҳороте гуфт: “Интернети баландсуръати Starlink акнун дар Тоҷикистон дастрас аст.”
Хадамоти алоқаи Ҷумҳурии Тоҷикистон дар Форуми байналмилалии сармоягузории Душанбе Инвест-2025, ки моҳи октябр баргузор шуд, бо ширкати Starlink Tajikistan (SpaceX) созишномаи литсензиониро барои оғози фаъолияти Starlink дар кишвар имзо кард.
Starlink як системаи ҷаҳонии алоқаи моҳвораӣ аст, ки барои таъмини дастрасии баландсуръати интернет аз ҳар гӯшаи ҷаҳон тарҳрезӣ шудааст.
Директори генералии «Тоҷиктелеком» Бахтовар Абдусатторзода қайд кард, ки ин шартнома асосан барои пайваст кардани сокинони минтақаҳои кӯҳистонӣ ва марзии душворгузари кишвар ба интернети моҳвораӣ нигаронида шудааст, ки дар он ҷо насби инфрасохтори анъанавӣ (хатҳои нахӣ-оптикӣ, кабелҳо) бинобар релефи кӯҳӣ ва зичии ками аҳолӣ душвор аст.
Ӯ дар бораи пайваст кардани минтақаҳои душвордастрас ба интернети баландсуръат гуфт, ки ин пеш аз ҳама ба муассисаҳои давлатӣ ва иҷтимоӣ – мактабҳо, беморхонаҳо ва маъмуриятҳои деҳот дахл дорад.
Ҳамин тариқ, ба кор андохтани шабакаи баландсифати Starlink уфуқҳои навро барои рақамикунонии минтақавӣ мекушояд, қайд кард ӯ.
“Дар бисёр кишварҳо, операторони берунаи ҷаҳонӣ, ба монанди Starlink, тавассути шарики миллӣ – дар мавриди мо, Тоҷиктелеком – фаъолият мекунанд. Ин модел ба давлат имкон медиҳад, ки трафикро назорат кунад, амнияти кибернетикиро таъмин кунад, тарифҳоро танзим кунад ва қонунгузории миллиро риоя кунад. Ҳама созишномаҳои тиҷоратӣ бо провайдерҳо тавассути Тоҷиктелеком анҷом дода мешаванд”, – гуфт ӯ.
Сипас ӯ гузориш дод, ки интернети моҳвораии Starlink аз шабакаи моҳвораҳои пастмадор истифода мебарад, ки ба кам кардани таъхири сигнал мусоидат мекунад.
Истифодабарандагон дар дигар кишварҳое, ки Starlink дастрас аст, суръатро аз даҳҳо то садҳо мегабит дар як сония гузориш медиҳанд — рақамҳои дақиқ аз шароити пайвастшавӣ вобастаанд.
Дар мавриди нархгузорӣ, ба гуфтаи директори генералии «Тоҷиктелеком», ин ба арзиши умумии интернет дар кишвар таъсири мустақим нахоҳад расонд. Технологияи алоқаи моҳвораӣ, аз ҷумла таҷҳизоти зарурӣ, одатан нисбат ба усулҳои анъанавии пайвастшавӣ гаронтар аст.
Аммо, тавассути гуфтушунид бо мақомоти маҳаллӣ, хароҷот ва тарифҳои таҷҳизот бо назардошти вазъи бозор ва хусусиятҳои минтақавӣ мутобиқ карда мешаванд.
